Saturday, December 17, 2011

பரதேசியின் டைரிக் குறிப்பு - 34

மார்கழி மாதத்தை கொண்டாடக் கற்றுக் கொடுத்தது அப்பாதான்.

காலையில் நாலரை மணிக்கு எழுந்து, குளித்து விட்டு (பெரும்பாலும் குளிர்ந்த நீர், வெந்நீர் இல்லை!) ஆசாரோத்தமாக சாளகிராமம் கொண்டு 'சிவ பூஜை' செய்வார். இந்தப் பூஜையில் கவனமும், பக்தியும் நிறைந்து இருக்கும். நைவேத்யம் போது அம்மா தயார் செய்த சர்க்கரை / வெண் பொங்கல் சுடச் சுட தயாராய் இருக்கும். தீபம் காட்டி அவர் அடிக்கும் மணியின் ஓசையில் தெய்வீகம் வீடு முழுதும் விரவி இருக்கும்.

பஞ்ச கச்சம், அங்கவஸ்திரம் சகிதம் திருவல்லிக்கேணி பெரிய தெரு பிள்ளையார் கோயிலுக்குப் போவார். அம்மாவும் கூடப் போவாள். முடித்து விட்டு, ஸ்ரீ ராகவேந்திரர் மடம், அப்படியே நடந்தால் பார்த்தசாரதி கோயில் வந்துவிடும்! கண் குளிர 'மீசை வெச்ச பெருமாள்'-ஐத் தரிசனம் செய்வார். வீடு வந்து காஃபி அருந்துபோது மணி ஆறரைதான் ஆகியிருக்கும்!

எங்களை எழுந்து கொள்ளச் சொல்லி என்றும் கட்டாயப் படுத்தியதில்லை. இருந்தாலும் பல தினங்களில் எழுந்திருந்து அவரோடு போயிருக்கிறேன்.

'மார்கழித் திங்கள்-ஐ மதி நிறைந்த நன்னாட்களாய்' மாற்றிய பெருமை என் அப்பாவிற்கு உண்டு.

No comments: